Poeta e scrittore Giuseppe Tuccio
Pinsera e cunsigghia
A cu leggi
Se chiddru ch’iu ti scrissi
u leggi a manu a manu
u poi mai capiri
chi ti vuliva diri?
Allura ti cunsigghiu
di leggiri attentamenti
tutti sti ma pinsera
chi, se ci pensi beni,
mali un ti ni veni.
---------------------------------------------------------------------------------------------------------------
Se ti veni un travagghiu i fari
un t'a maccagnuniari .
A dumani un rinviari
chiddru c’oi poi rializzari,
pirchì un poi sapiri
chi ti po succiriri.
T’ha mettiri sempri
da cundizioni i diri:
- Se haiu un travagghiu i fari
u pozzu sudisfari.
---------------------------------------------------------------------------------------------------------------
Se o travagghiu isti tardu
e un ti dissi nuddru nenti
un cantari vittoria.
U to capu n’è a currenti.
In cert’atri occasioni,
quannu menu ti l’aspetti
senza nuddra compassioni
iddru ti fa i dispetti.
---------------------------------------------------------------------------------------------------------------
Se u scuru ti cumpari
e ti scanta o ti spaventa
un ti ni pruccupari:
nuddru ti nsullenta.
Sai cu ti sta darreri?
U tintu d’intra i tia
Chi, spissu e vulintieri,
ppi nenti si sciarria.
Se ci voi ragiunari
ccu tutti ha stari mpaci
e se voi fari chistu
a priari a Gesù Cristu.
Sugnu sicuru allura
chi di nuddru hai chiù paura.
---------------------------------------------------------------------------------------------------------------
Se vivi di stenti
un pinsari a nenti,
pirchì chiù ci pensi
chiù crisciunu i ntenzi.
Chiutostu nesci fora,
vai a smarinari.
Se ci pensi ancora?
Mettiti a cantari.
---------------------------------------------------------------------------------------------------------------
Se un poi aviri figghi
e ti voi maritari
diccillu a to carusa
ci po macari stari.
Se tu nenti ci dici
quann’iddra si ni duna
poi viviri filici ?
---------------------------------------------------------------------------------------------------------------
Se occupi un pusticeddru
tenilu comu un carruseddru.
Fari forsi u to duviri
ti duna assai chi diri?
---------------------------------------------------------------------------------------------------------------
Se quarcunu havi fami
e ti dumanna u pani
un trattallu comu un cani
i so un su maliframi.
---------------------------------------------------------------------------------------------------------------
Se figghia fimmina hai avutu
e cerchi i riritari
pensici ppi subutu
e assai un ci mbrisiari.
A to ranni eredità?
E’ cosa sulu i maistà.
---------------------------------------------------------------------------------------------------------------
Se un pusseri nenti
e si sanu di menti
un campari comu un re
ma vivi comedderè.
Cu pusseri i ricchizzi
è schiavu de so beni,
cu supporta i ravizzi
è schiavu de so peni.
Travagghia ccu piaciri
E ti poi divirtiri.
U divirtimentu un è
spenniri comu un re
ma canusciri e sapiri,
spenniri ma ccu piaciri.
---------------------------------------------------------------------------------------------------------------
Se hai un figghiu sulu
e un ni voi aviri atri
sentilu u cunsigghiu
di quarchi atru patri.
Pensa chi se mori
o ti rinesci mali
un riri u to cori.
Se ppi dispirazioni
u vulissitu rimpiazzari
chi gran dilusioni
vinissitu a truvari.
---------------------------------------------------------------------------------------------------------------
Se hai i rocchi o suli
e un vai a travagghiari
stai puru accura,
c’a rennita chi hai
po un ti bastari.
Unna abitudini è
viviri comu un re
un basta chiddru e quannu
o minimu malannu.
Perciò basta un nenti,
picca mpirimenti
e i ricchizzi to
ti strichi do portò.
---------------------------------------------------------------------------------------------------------------
Se ti veni a mpunenza
e hai chiù i trent’anni
un aviri strafuttenza
cuminciaru i to malanni.
Vai o spitali, do dutturi
chi ti po dari i curi
e rimidiari a situazioni
ccu na simplic’ignizioni.
---------------------------------------------------------------------------------------------------------------
Se ti criri chi sa che
o travagghiu, da cursa
in tutti i to discursa
virità un ci n’è.
Se vali veramenti
ti cummeni diri nenti.
Sarannu i supiriori
viriri i capacità,
tirari u cunchisioni
de to riali qualità.
---------------------------------------------------------------------------------------------------------------
Se tu hai chiusu a porta
e si prisenta a to casa
unu chi ti vasa
un ti fari storta.
Se è pirsuna onesta
facci tanta festa,
ma se è un impusturi
trattulu ccu riuri.
---------------------------------------------------------------------------------------------------------------
Se ti voi mparintari
ccu na carusa megghiu i tia
i sordi un circari
chi sunu fitinzia.
Cerca di truvalla,
se hai a valintizza,
tra chiddri i cugnizioni.
A so unica ricchizza
è viviri civili
e pusseriri ccu franchizza
dicuru e ducazioni.
---------------------------------------------------------------------------------------------------------------
Se quarcunu tuppulia
e ti dumanna u pani
un trattallu comu un cani
se di friddu trimulia.
Se voli dinari
un ti ni pruccupari
chiurici a porta nfacci
e mannulu a smarinari.
---------------------------------------------------------------------------------------------------------------
Se risorbi un prublema
e u risurtatu un ti veni
un ci pruvari arreni
ti po beniri a pustema.
E’ megghiu suspinniri
e rusceriri se c’è
na tazza i cafè
o un film di viriri.
Rimanna a soluzioni
e ti ni duni facili
chi a so cumplicazioni
era n’arruri assai vili
c’un putivutu truvari
mancu a corpa di fucili.
---------------------------------------------------------------------------------------------------------------
Se u cirbellu to è stancu
e tu u sforzi ancora
po essiri c’otteni
quarchi risurtatu.
Ma se di dru mumentu
i cosi vanu lisci
un poi mai sapiri
com’iddru va finisci.
---------------------------------------------------------------------------------------------------------------
Se dumanni a limosina
da sira a matina
caputunu tanti genti
c’animati di buntà
senza pinsari a nenti
ti fanu a carità.
Ma se u fai ppi beni stari
ppi viziu o pirvirsioni
chi ti poi spittari
se non disprezzu e malazioni?
---------------------------------------------------------------------------------------------------------------
Se quarchi caruseddru,
sia bruttu sia beddru,
roba cosi i mangiari
un u dinunziari.
Però facci capiri
cco to bonu diri
chi scangi di rubari
è megghiu dumannari.
---------------------------------------------------------------------------------------------------------------
Se ppi casu u sturienti
si nustria do chiù bravu
fingi comu u tali
chi si leggi u giurnali.
Po macari capitari
ch’iddru rinesci a fari
dri cosi chi tu stessu
ci hai spiegatu spessu.
Se tu u metti a sulu
u povuru sturienti,
stai certu e ben sicuru,
un sapi mai nenti.
---------------------------------------------------------------------------------------------------------------
Se tutti i to ricchizzi
un ti fanu pinsari
e ranni ravizzi
chi ponu prucurari
si viri chi hai crisciutu
tra chiddri liddri liddri
c’un hanu mai suffrutu
manc’un mali di capiddri.
---------------------------------------------------------------------------------------------------------------
Se i to ginitura
ti mannunu a scola
e tu capisci c’un si capaci
un fari finta i nenti
com’hanu fattu tanti
chi s’hanu diplumatu
chiù zoppi do sciancatu.
U diplomu, caru miu,
è sulu un pezzu i carta
c’avi un gran valuri
se puzza di sururi,
sennò diventa un pisu
chi ti tocca i purtari
assemi o mali stari
c’un ti duna surrisu.
Quant’assu statu megghiu
c’assitu iutu o mastru
ppi nsignariti n’arti
chi se un t’assu riccutu
armenu t’assu datu
pani travagghiatu.
---------------------------------------------------------------------------------------------------------------
Se mori u to cumpagnu
e u chiangi ccu ritegnu
un c’è bisognu i dillu
un ti lassau mancu un spillu.
Se inveci ecchi strepiti
e pari dispirata
macari se nuddru u sapi
ti lassau china a farata.
Dopo tri gh’iorna i luttu
u duluri to è distruttu.
Ma si tanta cuntenta
d’aviri sinarmenti
svilatu a tutti i genti
l’amuri to imminenti
c’unu de pritinnenti.
---------------------------------------------------------------------------------------------------------------
Se un pusseri nenti
e si ntilicenti
a vita è nfilici
comu di dri ricchi
chi sunu dificienti.
---------------------------------------------------------------------------------------------------------------
Se i to figghi ormai dutati
stanu spranza d’atri cosi
un barari a queni bonu
e mancu a què vastasi.
Vinni tuttu chiddru c’hai
metti i sordi de sacchetti
studia tutta a situazioni
pigghia allura a dicisioni.
Tenatilli, mancu a dillu,
tutti i sordi chi hai bisognu
ppi quann’è l’utimu iornu.
Tuttu chiddru chi ti resta
dallu a tutti in proporzioni
ad ognunu de to figghi
a secunnu i condizioni.
Ma se nuddru avi bisognu
e a saluti t’u cunsenti
spennili in divertimenti
a orienti, a occidenti
e un pinsari a nenti.
T’accorgi ch’i to figghi
ni sunu assai cuntenti.
---------------------------------------------------------------------------------------------------------------
Se si na figghia unica
di du cristiani ricchi
e tanti spasimanti
ti pizzunu l’occhi,
comu du rossi zicchi,
lassiti curtiggiari
ma un ti parulari.
Quannu ricanusci
ch’i tempi su maturi
calici a testa a chiddru
chi menu i tutti l’atri
senza nuddru russuri
ti prumetti di dari
sulu u so ranni amuri.
---------------------------------------------------------------------------------------------------------------
Se ti criri chi sa che
pirchì si malandrinu
un ti cririri un re
e mancu Sant’Austinu.
A priputenza chi hai
ti procura sulu guai.
Se ti piaci a libertà?
Tratta ill’atri a dignità.
---------------------------------------------------------------------------------------------------------------
Se prima di muriri
ti voi cunfissari
quarchi piccateddru
pp’un ti turmintari
e si duna u casu
c’un c’eni u parrinu
a cui voi rapiri
tuttu u to cori,
rivorgiti direttamenti
a nostru Signori
chi havi a piaciri
tuttu u to suffriri.
---------------------------------------------------------------------------------------------------------------
Se hai centumila liri
e bisognu i spisa hai
attentu a cosa fai
pensa all’abbiniri.
Quannu bisognu hai
e tuppulii a quarcunu
ti poi rassignari
un ti rapi nissunu.
---------------------------------------------------------------------------------------------------------------
Se, nisciutu de vanca,
ti criri già rivatu
u cuntu chi ti hai fattu
ti dicu ch’è sbagghiatu.
Ppi qualunqui sia postu
chiddru chi hai fattu a scola
un serbi quasi a nenti
spicificatamenti,
ma ti serbi a capiri
se leggi ccu ntinzioni
chiddru chi ti bisogna
ppa to sistemazioni.
---------------------------------------------------------------------------------------------------------------
Se un cristianu è tisu tisu
stinnicchiatu comu un mortu
un ci chiamati a nuddru
pirchì avi i furticchia i ncoddru.
A prima cosa i fari
è tinirivi luntanu
ppi lassallu rispirari.
Dostramenti iti a circari
e mittiticcilla in manu
na chiavi masculina
ppi fallu rilassari.
---------------------------------------------------------------------------------------------------------------
Se hai un rifridduri
un accurri iri a fari
a cura do dutturi
chi ti duna pinnili
e un sacciu quantu aiutu
ti ponu iddri dari.
Pigghia du cipuddri
scrafunghili cche manu
cunnucili de naschi
e sciavuriali pianu.
U nasu e l’occhi allura
diventunu cannola
ch’inghiunu a manu a manu
un vasu sanu sanu.
---------------------------------------------------------------------------------------------------------------
Se hai un puzzu i sordi
u ni cuntari magnu
poi dari l’imprissioni
d’essiri un taccagnu.
Cco forti cunta e scunta
mancu a fallu apposta
u diavulu ti ni leva na iunta.
---------------------------------------------------------------------------------------------------------------
Se cerchi na carusa
sulu ppi passa tempu
un t’affannari tantu
pirchì ni poi truvari
tutti chiddri chi voi.
Però stai attentu
di fari menu u furbu
un ti n’apprufittari
è chiddru ch’iddra voli.
L’omunu è cacciaturi
e chistu tutti u sanu
però un poi sapiri
di chiddru ch’è capaci
a figghia do dimoniu.
---------------------------------------------------------------------------------------------------------------
Se ti capita ppi strata
na qualunqui cugnintura
fattilla scappari
e vai ppa to vintura.
Allura sicuramenti
un ti succeri nenti.
Un pinsari chi a certa età
ci ponu essiri bifani
chi ti fanu cumpariri
cosi boni senza fini.
---------------------------------------------------------------------------------------------------------------
Se ti cerchi i maritari
e voi na bona carusa
un ti n’iri assai luntanu
poi truvari na gnistiusa.
Poi aviri a purtata i manu
l’ornamentu do to vanu.
Ppi rivari a cunchisioni
un circari nfurmazioni.
Poi cariri a banni boni
o truvari delusioni.
---------------------------------------------------------------------------------------------------------------
Se ricivi parulazzi
ppi bucca i carusazzi
un ti dari pena
camina a to manera.
Se ci provunu arreni
paici u cafeni.
Se riprovunu ancora
levici a palora.
Cco beddru tumpuluni
i pigghi e i etti a gnuni.
---------------------------------------------------------------------------------------------------------------
Se ti mori n’amicu
o corchi to parenti
e un trovi occasioni
di putillu taliari
ppi l’utimu salutu
un ti dari colliri.
Senza fallu apposta
fai cosa tantu giusta.
Prifiribili è u cunfortu
do caru amicu vivu
e non di quannu è mortu.
---------------------------------------------------------------------------------------------------------------
Se cummetti na minghiata
e ti pari risicata
un pinsari i falla franca
cco scappari da banca;
un arruri accussì ranni
po siri causa i malanni.
Cerca i cuntari beni
u discursu comu eni
all’abbucatu di famigghia
ch’è chiddru chi ti cunsigghia
ma u cunsigghiu so
un po siri chiddru to
ma secunnu u signali
do codici pinali.
---------------------------------------------------------------------------------------------------------------
Se hai campatu liddru liddru
comu vivi u cardiddru
chi mutivu hai i prutistari
se hai pinsatu a gh’iucari?
Alla resa de cunta
chi ti poi aspittari
se non sentiri cantari
cu avi china a iunta?
---------------------------------------------------------------------------------------------------------------
Se capita i leggiri
in presenza i quedderè
un ti fari viriri
di valiri chi sa che.
Vai leggiu, un savutari
ppi dari l’imprissioni
di finiri subutu e
capiri zoccheegghè.
Pirchì quannu hai finutu
un c’è bisognu i dillu
un hai caputu nenti
do so continutu.
---------------------------------------------------------------------------------------------------------------
Se to figghiu u picciriddru
un havi vogghia i mangiari
e tu sai chi un avi fami
u nu nculiari.
un pinsari propriu a nenti
e ritira l’occorrenti.
U criaturu allura pensa
C’un c’è nenti i fari:
- O ti mangi sta minestra
o ti etti i sta finestra.
---------------------------------------------------------------------------------------------------------------
Se tanti un ti ponu viriri
e u cori to riri
camina ppa to strata
è a cosa ben pinsata.
Un manca l’occasioni
fari capiri a tutti
ch’in tanti situazioni
su genti farabutti.
E mancu a fallu apposta
tu mancu ti ni duni
a c’un ti dava sosta
ti duna ora ragioni.
---------------------------------------------------------------------------------------------------------------
Se t’accatti un paru i scarpi
e hai u peri longu e rossu
scartatilli beddri ranni
se un voi atri malanni.
Un fari comu a fimmina
chi ppi dari l’imprissioni
d’aviri un peri picciulu
si ci gnutticaru i ita,
divintau sciancata
e finiu di fari a zita.
---------------------------------------------------------------------------------------------------------------
Se voi fari u vucceri
pp’aviri i parrucchiani
bara a pulizia
e non sulu da putia.
Un ci calari u prezzu
chi poi è na fissaria
chiutostu teni a carni
luntanu da lurdia.
A carni squartariala
e dacci u prezzu giustu
in modu ch’i pirsuni
s’a scartunu di gustu.
Sulu accussì facennu
poi aviri a cirtizza
di vinniri assai carni
e tanta i dra sosizza.
Se, aumintata a vinnita,
ti metti a cavuciari
pripariti a smuntari
pirchì si finiu allura
tutta a to abbintura.
---------------------------------------------------------------------------------------------------------------
Se diventi dutturi
e ti criri di valuri
cerca d’un t’affannari
ppi riccu divintari.
Se hai tempu i perdiri
duniti e ricerchi.
poi macari strummintari
na certa miricina
chi pozza in quarchi modu
a spranza armenu dari
a chiddi chi da vita
un appunu a furtuna
d’essiri nati sani
comu i pisci e i rani.
---------------------------------------------------------------------------------------------------------------
Se hai na soru piccila
o un frati nicareddru
un a fari crisciri
com’un avissi a nuddru.
Quannu hai tempu liburu
ioca cca picciriddra
mentri chi to matruzza
ci lesti a vistineddra.
---------------------------------------------------------------------------------------------------------------
Se hai un figghiu sulu
ed è picciriddru
un u fari crisciri
com’un avissi a nuddru.
Se hai un’ura i tempu
passatilla ccu iddru
e se un hai chiffari
portulu a passiari.
Ma se ricanusci
c’un poi lassari
mannulu a gh’iucari
cco figghiu do cumpari.
---------------------------------------------------------------------------------------------------------------
Se hai i cavisi strazzati
e si u sulu tra tant’atri
un accorri fruntariti
speciarmenti se do sturiu
si tra chiddri priparati.
A puvirtà un è marchiu
c’un si po cancillari
comu ppi seculi un fu
a chiù tinta schiavitù.
---------------------------------------------------------------------------------------------------------------
Se voi siri rispittatu
unna ti trovi e trovi
fallu bonu u to duviri
e un ti pari di suffriri.
Un è nicissariu chi
u fai nutari all’atri
di siri ntirissanti.
Cerca inveci di pinsari
chi ccu chiddri chi hai da fari
su pirsuni ntilicenti
c’un faticunu a capiri
se ppi daveru sì
chiddru chi fai cririri.
---------------------------------------------------------------------------------------------------------------
Se si figghia unica
e si picca agiata
un fari fatica
a siri mizzigghiata.
Un maritu u poi truvari
ma un ti lisingari
di fari zoccu voi
cche spasimanti toi.
---------------------------------------------------------------------------------------------------------------
Se si da finanzia,
da pulizia stratali
o de carrabineri
e sini di sirbiziu
in cità o ppe strati,
vestiti di nivuru
e un talari a nuddru
mancu o scupastrati.
Un sentiri i scusi
de vicini e luntani
e i farsi laminateli
di certuni cristiani.
Stenni puri u virbali
se u tortu so è gravi.
Ma se è evirenti
c’un porta prigiuriziu
a nuddru di li genti
fai a finta i nenti.
Riorda di siri prima omu
e poi militari
e chi c’è puru ppi tia
u verbu pirdunari.
---------------------------------------------------------------------------------------------------------------
Se si prufissiunista
o giomitru o ngigneri,
architettu o ragionieri
e ti veni a circari
un novu parrucchianu
chi ti dumanna u prezzu
d’on travagghiu i fari,
dicci chi hai chiffari
e mannulu a passiari.
---------------------------------------------------------------------------------------------------------------
Se hai un pusticeddru
chi un ti custau nenti
hai tuttu u dirittu
di fari u strafuttenti.
Pirchì u sai tu sulu
e cu ti favuriu
chi a tia custau picca
e a iddru chiù di nenti.
Se inveci u to postu
è fruttu di sururi
hai sulu u dirittu
di filari rittu.
Se chistu un avveni
si sempri menzu i peni.
---------------------------------------------------------------------------------------------------------------
Se ti dumannunu un fauri
e tu ciù poi fari
un perdi propriu nenti
se i poi cuntintari.
Però stai attentu
d’un luvari nenti a nuddru
se un ti voi mettiri
tuttu u munnu ncoddru.
---------------------------------------------------------------------------------------------------------------
Se voi drizzari a unu
pirchì è chiovu tortu
un hai nenti i fari:
- L’ha sulu suppurtari.
A fari sempri in moru
c’un si ni po dunari.
O nerbu un pinsari
e mancu e tumpuluna
chi de tempi passati
un appunu furtuna.
Cerca inveci i gnurarlu
quantu chiù è possibili
e un fari mai pisari
u statu di tensioni
sennò un poi ottiniri
chi ti voi prupuniri.
Passatu un certu tempu,
quasi senza vulillu,
iddru veni a tia lentu
ccu n’atr’attiggiamentu
e ricanusci chi tu
si chiddru chi daveru
ci voi beni veru.
Allura e sulu allura
ti ci poi bicinari
e forsi anchi schirzari.
---------------------------------------------------------------------------------------------------------------
Se ti voi mucciari
i piccati murtali
e voi fari cririri
d’essiri a Diu fidili,
a tutti fai capiri
pirsinu o cunfissuri
e a cu ti teni libiru
di stu munnu d’arraffuna
menu c’a to cuscenza
c’un ni pirduna menza.
Perciò, prima i moriri,
se quarchi spranza hai
di putiriti sarbari,
rivorgiti o Signuri
patri de piccaturi.
---------------------------------------------------------------------------------------------------------------
Se hai malu chiffari
e un hai vogghia i nenti
cerca d’un pinsari
ma vai a smarinari.
Pirchì fari nenti
porta a menti ntenzi
chi lenti, assai lenti
fanu nesciri i senzi.
---------------------------------------------------------------------------------------------------------------
Se viri quarchi firmi
di chiddri di scantari
e tu un si maturu
di putiri taliari
certi brutti sceni
chi ponu mprissiunari
pensa cca to menti
chi chiddri chi tu viri
un su ppi nenti veri,
ma su fruttu i fantasia
e di certu fissaria.
Ma se duranti a notti
u sonnu un ti veni
pensa a Gesù Cristu,
a Maria, a tutti i santi.
Chiddru chi viristi
spirisci d’on istanti.
---------------------------------------------------------------------------------------------------------------
Se hai di fari un viaggiu
e t’ha susiri matina
cerca d’un ti curcari
di prima siritina.
Si po virificari,
e quasi sempri accari,
chi ti giri ppi durmiri
e ti metti a pinsari.
U raloggiu intanto gira
e l’ura s’avvicina
e po essiri chi dormi
quann’iddru propriu arriva.
Se ti rivigghi all’orariu
e ti susi all’ura giusta
comu camini scavusu
ti veni u duluri i testa.
Allura chi s’ha fari?
Vatinni a divirtiri
e ricogghiti do tardu
possibirmenti stancu.
Sugnu sicuru e certu
chi comu ti metti a lettu
ppa stanchizza c’hai
ti drummisci comu mai,
e all’orariu giustu giustu
ti rivigghi friscu friscu
e ti susi arzillu arzillu
pp’on viaggiu assai tranquillu.
---------------------------------------------------------------------------------------------------------------
Se a fasulla filicità
si cattassi cche zicchini
u munnu fussi chinu
di ricchi assassini.
Iddra è l’unicu tisoru
di cui nuddru è prupritariu
ma chi tu poi sulu aviri
intra u to ranni cori
senza nessun suffriri
comu l’aria chi rispiri
facennu opiri di beni.
---------------------------------------------------------------------------------------------------------------
Se hai bisognu i cattari
qualunquisia cosa
i putiara assai tanti
girili tutti quanti
e un dumannari quant’è
ma paia chiddru ch’è.
Intantu pigghia nota
de prezza d’ogni paccu
e accussì poi capiri
cu ti nfila intra u saccu.
---------------------------------------------------------------------------------------------------------------
Se fai u scupastrati
un hai di fruntariti.
E’ un travagghiu comu atri
nent’affattu mpurtanti
ppe superbi e i gnuranti.
Dipenni sulu i tia
cancillari a diciria
facennu ccu valintia
assai beni a pulizia.
Allura e sulu allura
poi iri a testa iavita
tra chiddri chi na vota
cririvutu baggiani
e nent’atri sunu ora
chi na maniata di ruffiani.
---------------------------------------------------------------------------------------------------------------
Se ha vattiari a to figghiu
un u diri a quedderè
Ma cerchiti un cumpari
c’un è queegghè.
Un fari comu chiddru
chi do misi di maggiu
un appi u curaggiu
di ncuitari a Turiddru.
Persi finu u vicinu
e i so tanti amici.
---------------------------------------------------------------------------------------------------------------
Se ti duni a pulitica
e un ti mpacchi i manu
un fari ssa fatica
e stattini luntanu.
Pirsinu i to parenti
ti votunu i spaddri
e ti mustrunu i renti
se pp’iddri un fai nenti.
---------------------------------------------------------------------------------------------------------------
Se un voi fumari chiuni
e ti voi luvari u viziu
un ti far’ittari a gnuni
comu succiriu a dru tiziu
chi scanci i scurzari a dosi
si cullau comu i rosi;
du pachetta un ci bastaru
e i renti ci cariaru.
Cco cunsigghiu chi ti dugnu,
ci poi scummittiri u pugnu
e se un ti manca a vuluntà
poi savutari mperistà.
Ppi na simana i fila
de sacchetti t’ha purtari
quattr’olivi di la Sila
e ti l’ha cumpanaggiari.
A sigaretta un ha pinsari
e aviri u curaggiu
di sapiri rifiutari
se ti voi mustrari saggiu.
Ppe primi deci iorna
ti veni sempri fami
e intantu i to vureddra
sputunu u catrami.
Iu ti tegnu a pricisari
chi haiu i ravizzi
di tant’omini che vizi.
Cumenza a fari a prova
e t’accorgi alla fini
di quantu è puzzolenti
e quantu ti navisa
u sciatu da genti.
---------------------------------------------------------------------------------------------------------------
Se, passati i cent’anni,
un t’ha successu nenti,
un cantari vittoria,
pirchì finu a chi mori
c’è sempri tempu
di sbagghiari ancora.
I guai da vita,
armalu ncivulutu,
è già na gran fortuna
se t’i porti do tabutu.
---------------------------------------------------------------------------------------------------------------
Se fai u pruvissuri
e a rennita è scarenti
t’ha pigghi cche sturienti
c’un capisciunu nenti?
Viri se un hai chiutostu
cummisu quarchi errori
o se virsatu mali
hai tuttu u to sururi.
---------------------------------------------------------------------------------------------------------------
Se veni cunvucatu
do capu dill’ufficiu
un ti spittari atru
chi quarchi sacrificiu
senza chi ti ni veni
nissunu binificiu.
Perciò vacci sirenu
vatinni priparatu
macari c’un canusci
qual è u risurtatu.
E se ti rifiuti?
Un ti succeri nenti.
Po siri chi da vita
si sempri nuccenti?
---------------------------------------------------------------------------------------------------------------
Se quannu veni u iornu
chi t’ha gh’iri a maritari
un ti ni mporta un cornu
duviri suppurtari
tutti i suffirenzi
chi ti ponu dari
i figghi e u mali stari
un fai nuddru mali
se ti vai a chiuriri
d’on beddru munasteru
o comu prifirisci
restiti puru a casa
a gh’iucari e bambuli
o e iatti a fari i fusa.
---------------------------------------------------------------------------------------------------------------
Se i to vicini i casa
ti tenunu in gran stima
è chi ti fai apprizzari
ppo to beni stari.
Però teniti forti
chi si surbigghiatu
appena ecchi un piritu
di tutti si sintutu.
Cerca di sfurzariti
d’iri sempri rittu
pirchì a primu acchittu
u cori to è trafittu.
---------------------------------------------------------------------------------------------------------------
Se da vita un hai mustratu
chiddru ch’è u to valuri
e hai sulu prifirutu
di tiniriti mucciatu
un poi essiri cuntentu.
U to ranni prigiuriziu
ha privatu tuttu u munnu
do to ranni ufficiu.
---------------------------------------------------------------------------------------------------------------
Se a morti ti ncatina
è pirchì l’hai vicina.
Se u cori to è sirenu
ti cogghi d’on balenu.
Se inveci è tristi assai
ti teni menzu i guai.
Se a spetti di cristianu
Gesù ci metti a manu.
Accussì sinarmenti
a morti mancu a senti.
---------------------------------------------------------------------------------------------------------------
Se mori to muggheri
resta puru sulu.
tenilu do cori
l’anticu to amori.
Se dopu bisognu hai
d’aviri a pulizia
viri se un figghiu
po barari a tia.
Se un hai a nuddru
chi ti fa a pulizia
un perdiri tempu
vatinni ppa to via.
E’ megghiu u ritiru
chi non a fitinzia.
---------------------------------------------------------------------------------------------------------------
Se si a foristeri
e hai vogghia di viniri
evita u suffriri
da povira muggheri.
Un diri quannu arrivi
e un telefunari
ccu gioia ti ricivi
assemi o to cori.
Se tu ci dici l’ura
di quannu arriva u trenu
u cori so un havi frenu
fino a quannu u ritardu dura.
---------------------------------------------------------------------------------------------------------------
Se vi caliati a scola
e vi n’iti a gh’iucari
ppi l’atri lezioni
un po chi piggiurari.
Se a casa vi firmati
e circati i sturiari
sicuru ppi l’estati
vi putiti svagari.
---------------------------------------------------------------------------------------------------------------
Se capiti do n’isula spirduta
macari nicareddra e china di pirsuni
ma ccu tanta vita e vigitazioni
ppi sbagghiu o ppi cuminazioni;
o si u sulu rimastu do disastru
ccu na beddra fimmina d’amari
un ti dannari l’arma, un bistimiari
ma ringrazia a Diu e scorda stu munnu
c’atru un è chi borgia di nfernu.
---------------------------------------------------------------------------------------------------------------
Se on cristianu raggiatizzu
ci veni u chiribizzu
di tagghiari i testi a tutti
un è tra i farabutti.
Vi riurdati a spirtizza
di dri vecchi sapintuna
ch’in tutta a so saggizza
u ni sbagghiaru una?
Un ci dati cumpirenza
a chiddri omini di panza
chi vi levunu a sistenza
in qualunqui circostanza.
---------------------------------------------------------------------------------------------------------------
Se chiddru chi dicidi un ha valuri
un c’è bisognu i dari spranzi vani
poi prucurari a tanti gran maluri
poi fari a figura de ruffiani.
Prumetti malamenti zoccu voi
e speciarmenti se e quannu poi.
---------------------------------------------------------------------------------------------------------------